DOBROVOLSKIY IVAN VIKENTEVICH

DOBROVOLSKIY IVAN VIKENTEVICH (1780-90 yillar orasida, Mogilyov gubernyasi — 1851, Grodno) — rus musiqa folklorshunosi, sozanda, kapelmeyster, musiqa-jamoat arbobi. Taxminan 1810 yildan Astraxonda yashagan. 1816 yildan “Osiyo musiqa jurnali” (“Aziatskiy muzikalniy jurnal”) ni nashr ettirgan. Jurnalning 8 soni (ya’ni 1816 yilda № 1 va № 2, 1817 yilda № 3 va №4, 1818 yilda № 5-8) chop etilib, unda Dobrovolskiy O’rta Osiyo (xususan o’zbek, turkman, qirg’iz va boshqalar), Kavkaz (arman, lezgin, Kabardin, cherkas, chechen va boshqalar) xalqlari, shuningdek, Astraxon tatarlari, qalmoklar musiqa folklori namunalarini to’plagan va yevropacha uslubda (fortepiano ijrosi uchun, garmoniyalashtirib) ilk bor nashr etgan. Ad.: Karomatov F., Iz istorii zapisi muzikalnogo folklora v Uzbekistane — Voprosi muzikalnoy kulturi Uzbekistana, VIP. 2, T., 1969.