KABOB

KABOB — go’sht, jigar, buyrak, dumba, charvi va boshqa masalliqlardan cho’g’da pishirib tayyorlanadigan taom. Six Kabob, titrama Kabob, qozon Kabob, parranda Kabob, qiyma Kabob, tandir Kabob, pomidor Kabob, dumbul Kabob, charvi Kabob, lo’la Kabob va boshqa turlari bor. Six Kabob — qo’y go’shtining lahm hamda dumba qismlaridan olib, har biri 10— 12 gramm keladigan lo’nda-lo’nda bo’laklarga bo’linadi, unga mayda to’g’ralgan piyoz, tuz, qalampir (murch), kashnich urug’i, zira, uzum sirkasi (anor yoki limon suvi) aralashtiriladi. Masalliq sirlangan yoki chinni idishga solinib, bir necha soat (4 soatdan 24 soatgacha) salqin joyda saqlanadi. So’ngra go’sht sixga 5-6 bo’lakdan qilib o’tkaziladi (sixning uchida yog’bo’lishi kerak). Sixlar ko’rada toshko’mir yoki pista ko’mir cho’g’ida pishiriladi. Kabobning bir tomoni qizarib pishgandan so’ng ikkinchi tomonini ag’darish kerak. 1 kilogramm go’shtga 2-3 bosh piyoz, 1 choy qoshiqsa tuz, 4 osh qoshiqda uzum sirkasi (yoki bir dona limon); ziravor ta’bga ko’ra kerak bo’ladi. Qiyma Kabob — go’sht qiymalagichdan 2 marta, piyoz bir marta o’tkazilgach, qiyma tayyorlanadi. Qiymaga tuxum chaqilib qalampir, tuz aralashtiriladi. So’ng qiymadan 50-60 gramm keladigan kiftalar yasaladi va uzunasiga sixga o’tkaziladi. Kifta ustiga un sepib yuqorida aytilgandek cho’g’da pishiriladi. 1 kilogramm go’shtga 3 bosh piyoz, 1 dona tuxum, 3-4 qoshiq un; ziravorlar kerak bo’ladi. Dumbul Kabob — makkajo’xorining dumbul so’tasidan tayyorlanadi. Tozalangan so’ta 3-4 santimetrdan qilib kesiladi va namakobga 2-3 soat solib qo’yiladi. So’ng 2-3 donadan qilib sixga o’tkaziladi va laxcha cho’g’da pishiriladi. Kabob O’rta Osiyo va yaqin Sharq, Kavkaz xalqlarining sevimli taomi hisoblanadi. Kabobni aslida chorvador xalqlar ijod etgan. Ad.: Maxmudov K., Uzbek taomlari, T., 19