ASALARI BO’RISI

ASALARI BO’RISI, filant (Philanthus triangulum) — kovlovchi arilar (sphecidae) oilasiga mansub xasharot. Uzunligi 17 millimetrgacha, yerdagi kovaklarga, ko’pincha uncha katta bo’lmagan jarliklarga uya quradi. Urg’ochisi o’z naslini falajlangan arilar bilan boqadi yoki ular yiqqan nektardan foydalanadi. Filantlarning boshqa turlari yakka yashovchi arilarni ovlaydi. Asalari bo’risi asalarichilikka katta ziyon keltiradi. Kurash chorasi asalarilar boqiladigan joylar yaqinidagi Asalari bo’risi uya qurishi mumkin bo’lgan, foydalanmaydigan joylarni haydab, ularning uyalarini buzib tashlashdan iborat.