Lan

Lan (Cervus dama) — bug’ular urug’iga mansub juft tuyokli hayvon. Erkagi shoxining uchi kuraksimon kengaygan, eng katta shoxining og’irligi 5 kilogrammcha keladi. Urg’ochisi shoxsiz. Erkagining bo’yi 130 santimetrcha, balandligi yag’ridan 85— 90 santimetr, og’irligi 40-90 kilogramm. Rangi yozda oq hollar aralash to’q sariq-chipor, qishda to’q kulrang. Iyun—iyulda 1-2 ta xoldor bola tug’adi. Bo’g’ozlik davri 7,5—8 oy. Lan shoxini may oyida tashlaydi, sentabrgacha yangisi o’sib chiqadi. Vatani — O’rta dengiz bo’yi mamlakatlari va kichik Osiyo, G’arbiy Ukrainada va Boltiqbo’yi respublikalaridagi qo’rikxona va parklarda ko’paytirilmoqda. Lan o’t va butalar bilan oziqlanadi. Go’shti iste’mol qilinadi. Hozir yovvoyi Lan kamayib ketganligi sababli muhofaza qilinadi.