Lavrdoshlar

Lavrdoshlar (Lauraceae) — ikki urutallali o’simliklar oilasi. Daraxt va butalar, ba’zan yarim buta va o’tlar. Ayrim turlari parazit. Bargi oddiy, etli, doim yashil, poyada ketma-ket joylashgan. Guli ikki (ba’zan bir) jinsli, to’g’ri, mayda to’pgul. Mevasi bir urug’li, rezavorsimon yoki danakli. Bargi, po’stlog’i va boshqa qismlarida efir moylar ishlab chiqaradigan bezchalari bor. Asosan, tropik, ba’zan subtropik iqlimda o’sadigan 40-50 turkumga mansub 2000 dan ortiq turni o’z ichiga oladi. Ko’p turlari (masalan, lavr) ziravor sifatida foydalaniladi yoki ulardan tibbiyot va farmasevtika uchun zarur bulgan efir moylari va kamfora olinadi. Ko’pchilik Lavrdoshlarning yog’ochi mebel ishlab chiqarish uchun xom ashyo hisoblanadi.