Holva

Holva — shirinlik turi. Qand yoki asaldan qaynatilgan qiyomga yog’, kunjut, yong’oq mag’zi, bodom mag’zi, un hamda boshqa masalliqlar solib tayorlanadi. Ta’mini yaxshilash uchun Holvaga kakao va kakao kukuni, mayiz, sukatlar, vanilin, limon kislota va boshqalar qo’shiladi. Solinadigan masalliqqa ko’ra, Holvaning bodroq Holva, mag’iz Holva, yong’oq Holva kungaboqar Holva, kunjut Holva, yeryong’oq Holva, pashmak Holva kabi turlari mavjud. Har bir Holva turi o’z navbatida qo’shilgan yordamchi masallig’iga qarab vanilin, shokoladli, vitaminlashtirilgan va boshqa nomlar bilan ataladi. Sharq mamlakatlarida, jumladan O’rta Osiyoda qadimdan qolvapazlik (holvachilik) kasbi mavjud bo’lgan. Yirik shaqarlarda holvapazlar uzum yoki tut shinnisi, un, yog’, kunjut, o’rik va boshqalardan, keyinchalik shakar va qanddan foydalanib turli-tuman Holvalarni tayyorlashga ixtisoslashganlar. Bodroq Holva tayyorlash uchun bodroq bilan qovurilgan yong’oq mag’zi go’sht qiymalagichdan o’tkaziladi (yoki yanchiladi). Mahsulot yog’langan laganchaga solinadi, ustidan eritilgan asal yoki qiyom quyib, yaxshilab aralashtiriladi, so’ng 1 santimetr qalinlikda yoyib presslab, to’rtburchak yoki romb shaklida kesiladi. Mag’iz Holva tayyorlash uchun o’rik yoki bodom, pista, yong’oqning mag’zi qovurilib, yog’surtilgan gaz patnisga I santimetr qalinlikda yoyib teriladi. Qozonga shakar solib, me’yoridan o’tkazib qiyom pishiriladi. Qiyom patnisdagi qovurilgan mag’izlar ustiga bir tekisda qilib quyiladi. Mahsulot sovigach, o’tkir pichoq yordamida kattaligi 4×10 santimetr keladigan bo’lakchalarga bo’linadi. Ayrim Holvalar tarkibida yog’ ko’p (30%) bo’lgani sababli tez buzilishi mumkin, namligi 4%. “Lavz” va “to’y”, “sovunak” kabi Holva turlariga qo’y va o’simlik yog’i, un, shakar qiyom, ko’pirtirilgan tuxum oqi va sovunak ildizi qaynatmasi qo’shiladi. Umid Ahrorov.