BALIQCHILIK PARVARISHXONASI

BALIQCHILIK PARVARISHXONASI — baliqchilik xo’jaliklari uchun yosh baliqlar yetkazib beruvchi korxona. O’zbekiston Respublikasining ko’pchilik Baliqchilik parvarishxonalari baliqchilik xo’jaliklarining baliq boqish hovuzlarida o’stirish uchun bir yoshli baliq chavoklari etkazib beradi. Baliqchilik parvarishxonasida baliq tuxumlarini urug’lantirish, yosh baliqlarni o’stirish, qishlatish, shuningdek katta yoshdagi zotli erkak va urg’ochi baliqlarni saqlash hovuzlari hamda karantin hovuzlari bo’ladi. Odatda, baliqlar bahorda tuxum qo’yadi. Tuxumdan chiqkan yosh baliqchalar kelasi yil bahorigacha saqlanadi. Erta bahorda bir yoshli baliq chavoqlari (baliqchalar) baliqchilik xo’jaliklari hovuzlarida boqish uchun tarqatiladi. O’zbekiston Respublikasidagi “O’zbaliq” korporasiyasi har yili 100 million donadan ortiq bir yillik baliq chavoqlari yetkazib beradi. Baliqchilik parvarishxonalarida, asosan, zog’ora baliq, oq Amur va boshqa baliqlar o’stiriladi.