YEXIDNALAR

YEXIDNALAR (Tachyglossidae) — tuxum qo’yib ko’payuvchi sut emizuvchilar turkumining bir oilasi. Kalta tumshuq vauzun tumshuq Yexidnalar urug’iga bo’linadi. Birinchi urug’ning 2, ikkinchisining esa 3 turi bor. Ular orasida Avstraliya kalta tumshuq exidnasi ancha keng tarqalgan. Tanasi katta, uzunligi 50 santimetrgacha, usti uchli ninalar bilan qoplangan. Oyoqlari kalta va yo’g’on, tirnoqlari baquvvat, yer kovlashga moslashgan. Dumi juda kalta. Jag’i muguz tumshuqqa aylangan, tili uzun, chuvalchangsimon, tishi yo’q. Urg’ochisida haqiqiy bachadon bo’lmaydi. 2 ta tuxumdonining tuxum yo’llari kloakaga ochiladi, odatda bitta tuxum qo’yadi, bola ochib chiqqunigacha tuxumini qorin xaltachasida olib yuradi. Sharqiy Avstraliya, Yangi Gvineya va Tasmaniyada yashaydi. Yexidnalar chumolilar, termitlar, chuvalchanglar va boshqalar bilan oziqlanadi. Tunda hayot kechiradi.