ADVEKTSIYA

ADVEKTSIYA (lotincha advectio — eltish), meteorologiyada — havo va u bilan birga fizik xossalari (temperatura, namlik va hokazo) ning gorizontal (yotiq) yo’nalishda ko’chishi. Biror hududdagi ob-havo va uni tashkil qiluvchi meteorologiya unsurlari ikkinchi bir hududga gorizontal ko’chganda Advektsiya yuz beradi. Shu hududning temperaturasi Advektsiya tufayli ko’tarilsa, iliqpik Advektsiyasi, aksincha, pasaysa — salqinlik Advektsiyasi deb ataladi. Advektsiya natijasida yuz beradigan atmosfera hodisalari advektiv hodisalar deb ataladi, masalan, advektiv tumanlar, momaqaldiroq, ayoz va boshqalar. Sovuq va issiq, quruq va nam havo massalari Advektsiyasi ob havoning qanday bo’lishida muhim rol o’ynaydi.