Neandertallar

Neandertallar-qadimgi qazilma odamlar, paleoantrollarning bir guruhi. Neandertallar skelet qoldiqlari (bosh miya qutisi, qovurg’alarning bo’laklari, yelka hamda son suyaklari va boshqalar) 1856 yili Neandertal vodiysida (Germaniyaning Dyusseldorf shahri yaqinida; nomi shundan olingan), shuningdek, Osiyo va Afrikada topilgan. Neandertallar bo’yi uncha baland bo’lmagan (160 santimetrga yaqin), miyasi yirik (1700 santimetr³), lekin hozirgi odamlarnikiga nisbatan sodda tuzilgan, ko’zining ustida qalin bo’rtig’i bo’lgan. Neandertallar bundan 200-35 ming yil avval-vyurm muzligi davrida G’arbiy Yevropada, odatda, g’orlarda yashab, yirik hayvonlarni ovlashgan, qurollar yasashgan. Olov yoqishni va undan foydalanishni bilishgan, to’da bo’lib hayot kechirishgan.