AGROMETEOROLOGIK XIZMAT KO’RSATISH

AGROMETEOROLOGIK XIZMAT KO’RSATISH — qishloq xo’jalik ishlab chiqarishining barcha bo’g’inlarini turli gidro va agrometeorologik axborotlar bilan tezkor ta’minlash. Agrometeorologik xizmat ko’rsatish majmuiga oldindan turli muddat uchun beriladigan ob-havo (bir oylik, 10, 7, 3 kunlik, sutkalik) prognozlari, ob-havoning xatarli hodisalari haqida ogohlantirish, ob-havo sharoitlari hamda ularning qishloq xo’jalik o’simliklari rivojlanishiga va hosilning shakllanishiga, o’tkaziladigan agrotexnik tadbirlarga ta’siri va boshqa haqidagi agrometeorologik ma’lumotlar va hokazo kiradi. Axborotlar kundalik, besh kunlik, haftalik va o’n kunlik sharh (byulleten) larda, shuningdek muhim yilnomalar shaklida, ishlab chiqarish ahamiyatiga ega bo’lgan davr yoki ob-havo sharoiti noqulay keladigan davr uchun agrometeorologik ma’lumotlar umumlashtirilgan maxsus ma’lumotnomalar tarzida hamda agrometeorologik omillarning ko’p yillik rejimi haqida ma’lumotlar bo’lgan rejimli yoki agroiqlimiy axborotlar shaklida bo’ladi. Qishloq xo’jalik mutaxassislari va rahbarlari bu ma’lumotlardan mavjud va kutilayotgan agrometeorologik sharoitni hisobga olgan holda ekish, sug’orish, oziqlantirish, qator oralariga ishlov berish, yig’im-terim ishlari va boshqa tadbirlarning muddatlarini rejalashtirishda foydalanadilar. Agrometeorologik xizmat ko’rsatish mijozlarning joylashgan joyi, axborotning ko’lami va uni yetkazib berish muddatlari ko’rsatilgan rejaga muvofiq amalga oshiriladi. O’zbekistonda qishloq xo’jaligiga Agrometeorologik xizmat ko’rsatish 1921 yil Toshkentda Turkiston meteorologiya instituti (Turkmet) tashkil etilishidan boshlangan. 1925 yildan bu institut O’rta Osiyo meteorologiya instituti (Sredazmet) deb atalgan. Institutining asosiy vazifasi qishloq xo’jaligini ekinlarning holati va rivojlanishi to’g’risidagi ma’lumotlar bilan ta’minlash, hududning mavjud ob-havo sharoitlari va iqlim resurslaridan ratsional foydalanish, ob-havoning xatarli hodisalaridan qishloq xo’jalik ob’yektlarini muhofaza qilish tadbirlari va boshqalar bo’ldi. O’zbekistonda Agrometeorologik xizmat ko’rsatish Gidrometeorologiya bosh boshqarmasi (“Boshgidromet”) va agrometeorologiya postlari tomonidan olib boriladi.