Category: O harfiga oid geografiyaga oid ensiklopedik atamalar

Och gaza – tog` ustidagi botiq, o`yiq reylef shakllari.

Oftobro` – quyoshga ro`para (kungay) tomon, yonbag`ir, shimoliy yarim shardagi tog`larning janubga qaragan yonbag`ri.

Otonoq– har yer-har yerda kichik-kichik do`ngchalari bo`lgan tekislik.

Otqindi tog` jinslari – yer yuzasiga oqib chiqqan magmaning qotishidan hosil bo`lgan magmatik tog` jinslari. Effuziv tog` jinslari ham deyiladi.

Ota (turklarda – ada) – orol. Joy nomlari tarkibida uchraydi. Masalan, Kaspiy dengizidagi Qamishliota.

Ost-Indiya (inglizcha Sharqiy Hindiston)- Hindiston hamda Janubiy va Janubi-Sharqiy Osiyodagi ba’zi mamlakatlar hududining yevropaliklar O`rtasidagi eski nomi. Vest-Indiya atamasining aksi sifatida vujudga kelgan.

Ost (nemischa)-sharq. Qisqa shaklda O harfi bilan belgilanadi.

Osma muzlik – tik tog` yonbag`rida sayozroq chuqurlikda duppayib turgan muzlik; tog` etagiga yetmasdan balandroqda «osilib» turadi.

Osilma muzlik – tik tog` yon bag`irlarida sayoz botiqlarda joylashgan muzlik.

Osilma – tog`larda katta qiyalikda ilon izi bo`lib ko`tariladigan yo`l, so`qmoq. «Piyodalar aylanib yurmasdan osilmadan chiqib qo`ya qoladi», «Osilmadan chiqsangiz, shunday qishloqqa kirasiz», deydilar.