Category: Y harfiga oid iqtisodiy ensiklopedik atamalar

YALPI TALAB – uy xo’jaliklari, firmalar, davlat va xorijliklar, mamlakat rezidentlari tomonidan ishlab chiqarilgan tovarlar va xizmatlarni baholarning turli darajasida sotib olishga qilingan xarajatlarning umumiy yig’indisi.

YALPI TAKLIF – mamlakatda, ma’lum vaqt davomida, tadbirkorlik sektori va davlat tomonidan ishlab chiqarilgan, va baholarning turli darajasida taklif qilinadigan tovar va xizmatlarning umumiy hajmi.

YALPI QO’SHILGAN QIYMAT – alohida olingan xo’jalik yurituvchi subyektlar, tarmoqlar va iqtisodiy sektorlarning faoliyati natijasi bo’lib, uning hajmi yalpi ishlab chiqarish va oraliq iste’moli orasidagi farqqa teng.

YALPI PUL TUSHUMI – tovar mahsuloti, ish, xizmat va moddiy boyliklarni sotishdan tushuvchi pulning umumiy miqdori.

YALPI MILLIY IXTIYORIDAGI DAROMAD (YAIMD) – shu mamlakat rezidentlari tomonidan olingan birlamchi daromadlar va sof joriy transfertlar yig’indisi.

YEVROPA DOLLARLAR – yevropa banklaridagi dollar jamg’armalari, kredit, operatsiyalarida foydalaniladi. AQSHdan tashqarida, ya’ni Yevropa banklarida mulk egalarining AQSH dollarida qo’ygan pul mablag’lari.

YALPI MILLIY DAROMAD – shu mamlakat rezidentlarining shu mamlakatningvaxorijiy mamlakatlarning YalMni yaratish davomida olgan birlamchi daromadlari (mulkdan olgan soliq bilan birga)ning yig’indisi.

YALPI MAHSULOTNI INFLIRLASH VA DEFLIRLASH – YaMM real hajmini nominal YaMMni narx indeksiga bo’lish orqali aniqlash.

YALPI ISHLAB CHIQARISH YOKI YALPI MAHSULOT – mamlakatda (tarmoqda, sektorda) ishlab chiqarilgan tovar va xizmatlarning ishlab chiqarilgan vaqtdagi bozor baholaridagi qiymati.

YALPI JAMG’ARISH – joriy davrda ishlab chiqarilgan va ana shu davrda iste’mol qilinmagan tovar va xizmatlarning rezident birliklari tomonidan faqat sotib olinishi natijasida shakllangan jamg’arma.