FIFA

FIFA (FIFA, Fransuzcha Federation internationale de Football Association so’zlari bosh harfidan) — xalqaro futbol uyushmalari federatsiyasi. 1904 yil Frantsiyada ta’sis etilgan. 204 ta milliy futbol uyushmasini birlashtiradi (2003). O’zbekiston 1994 yildan a’zo. Turli miqyosdagi xalqaro musobaqalar: milliy jamoalar o’rtasida jahon chempionati (1930 yildan), mini futbol bo’yicha, ayollar jahon chempionatini, o’smirlar o’rtasida, 16-17 yoshli futbolchilarning jahon chempionatini, Qitalararo turnir va kubok musobaqalarini tashkil qiladi va o’tkazadi. “FIFA magazin” bezakli jur., “FIFA Nyus” oylik byulletenini nashr etadi. Futbolni targ’ib qilish ishidagi ulkan muvaffaqiyatlari uchun O’zbekistonda xizmat ko’rsatgan sport ustozi S. Arutyunov FIFA medali bilan mukofotlangan (1998), “Neftchi” (Farg’ona) jamoasi futbolchisi S. Lebedev FIFA terma jamoasi tarkibida o’ynagan (1997).