Navandak, Navand

Navandak, Navand — o’rta asrdagi Chag’oniyon shaharlaridan biri (5-6— 18-asrlar). Ba’zi olimlar fikricha, “Navandak” atamasi “nav” va “xandaq”dan olinib “yangi xandaq” ma’nosini anglatgan. “Navandak” nomi “Navand” (“choparlar”) so’zining kichraytirilgan shakli deb qarashlar ham bor (Sh. Kamoliddinov). 12-asrda Balxdagi mahallalardan va Samarqand darvozalaridan biri “navand” deb atalgan. 15-asr oxirida temuriylar davrida Navandakda zarbxona bo’lgan, bu yerda “Navand” deb bitilgan mahalliy mis tangachalar chiqarilgan. Surxondaryo viloyatidagi Uzun shahridan 3 kilometr shimoli- Sharqda joylashgan Kofirqal’a (yoki Novandaktepa) shahar xarobasi o’rnida bo’lgan deb hisoblanadi. Shahar xandaq (kengligi 50 metr) bilan o’ralgan mustahkam Ark, Shahriston (450×450 metr) va katta raboddan tashkil topgan. Ad.: Kamaliddinov Sh. S, Istoricheskaya geografiya Yujnogo Sogda i Toxaristana po araboyazichnim istochnikam IX— nachala XIII vv., T., 1996.