“O’ZBEKISTON” ASHULA VA RAQS ANSAMBLI

“O’ZBEKISTON” ASHULA VA RAQS ANSAMBLI — M. Qoriyoqubov nomidagi Xalq badiiy jamoalar direktsiyasi qoshidagi badiiy jamoa. 1936 yil XKS qaroriga binoan, O’zbekiston ashula va raqs katta ansambli nomi bilan O’zbek davlat filarmoniyasi tarkibida tashkil etilgan (rahbari T. Jalilov, 120 kishidan iborat). 1968— 97 yillarda “Shodlik” ashula va raqs ansambli nomi bilan faoliyat ko’rsatgan. 1997 yildan hozirgi nomda. Tarkibida xonanda, raqqos(a) va sozandalar (jami 70 kishidan iborat) guruhlari mavjud. Ansamblning ko’p qirrali repertuaridan yirik kompozitsiyalar (“Jon O’zbekiston” vokal- xoreografik syuitasi, “Navro’z” teatrlashtirilgan tomoshasi va boshqalar), o’zbek mumtoz (“Rok”, “Soqiynomai savti Kalon”, “Abdurahmonbegi” kabi) va turli vohalarga xos xalq ashula, qo’shiq va raqslari (“Surxondaryo termalari”, “Norinnorin”, “Farg’ona ruboiysi”, “Buxoro naqshlari” va boshqalar), N. Hasanov, M. Mirzayev, Ts. Zokirov, B. Aliyev, T.Otaboyev kabi o’zbek kompozitor va bastakorlarining asarlari o’rin olgan. Jamoa chet mamlakatlarda o’tkazilgan O’zbekiston madaniyat kunlari, o’zbek san’ati va adabiyoti dekadalari, turli tanlov va festivallar, “Navro’z”, “Mustaqillik” kabi milliy va boshqalar bayram va tantanalarning doimiy qatnashchisi. Ansambl O’zbekistonning barcha viloyatlarida muntazam kontsertlar uyushtirib, turli qurilishlar, 2-jahon urushi jangchilari huzurida madaniy xizmat qilgan. U, shuningdek, Osiyo, Yevropa, Shimol va Janubiy Amerika, Afrika mamlakatlari va Avstraliyada gastrolda bo’lgan. Ansambl tarkibida badiiy va musiqa rahbarlari D. Zokirov, H.Yamshoyaov, M.Mirzayev, N.Hasanov, O’zbekistonda xizmat ko’rsatgan artistlar K. Otaboyev, S. Yo’ldoshevlar, balet- meysterlar I. Oqilov, L. Petrosova, Q. Mo’minov, D. Jabborova, raqqos(a)lar Q. Mirkarimova, Q. Do’stmuhamedova, O’zbekistonda xizmat ko’rsatgan artist N. Shermatov, xonanda va sozandalar E. Yo’ldoshev, F. Umarov,Sh. Jo’raev, G’. Yoqubov, N. Haydarov, O’zbekistonda xizmat ko’rsatgan artistlar D. Islomov, G’. Azimov, so’z ustalari G’. Tojia’loev, O’.Siddiqov va boshqalar san’atkorlar faoliyat ko’rsatgan. Hozirda O’zbekistonda xizmat ko’rsatgan artistlar T. Otaboyev musiqa rahbari, bosh baletmeysteri — G. Shirinova. Yetakchi ijrochilari — O’zbekistonda xizmat ko’rsatgan artistlar H. Azimov, S. Mo’minov, M. Sohibov, H.Rasulov, shuningdek, A. Sharipov, S. Mansurxo’jaeva, N. Olimovalar. Ansambl bir necha kino va telefilmlarda suratga tushgan (“Shashmaqom”, 1972; “Ali bobo va 40 qaroqchi”, 1980 va boshqalar). Avaz Vahobov.