Xmelniskiy Bogdan (Zinoviy) Mixaylovich

Xmelniskiy Bogdan (Zinoviy) Mixaylovich (taxminan 1595-1657.6.8) — ukrain davlat arbobi, sarkarda, Ukraina getmani (1648-57), polyaklar zulmiga qarshi ko’tarilgan mustaqillik urushi rahbari (1648-54). 1637— 38 yillardagi xalq qo’zgolonlarida qatnashgan. 1640 yil o’rtalarida polyaklarga qarshi qo’zg’olonga tayyorgarlik ko’rib, kazaklar qo’shinini tuzgan. 1648 yil qamoqqa olingan, lekin ko’p o’tmay Zaporoje Sechiga qochgan. Ijtimoiy, diniy-milliy zulmga qarshi qonli va uzoq davom etgan ozodlik urushlari 1648 yil yanvarda Xmelniskiy boshchiligidagi milliy inqilobga aylangan. Bu urushlarda Qrim xonligi, Rossiya, Shvetsiya, Transilvaniya, Usmonli turk imperiyasi, Moldova va boshqalar qatnashgan. Ukraina — Getmanlik mustaqil davlat bo’ldi. 1654 yildan murakkab tashqi siyosat va harbiy vaziyat (Polsha qiroli katta armiya yuborgan) oqibatida Xmelniskiy Moskva bilan davlatlararo harbiy ittifoq tuzgan. Xmelniskiy mustaqil getmanlik hokimiyatini, cheklangan tashqi siyosiy munosabatlar va kazak qo’shinlarining 60 minglik tarkibini saqlab qolish to’g’risida taklif qilgan. Ukraina —Getmanlik hokimiyatini tashqi siyosatda tan olinishiga erishgan. Ukrainaga avtonom huquqi berilgan. Xmelniskiy ukrain xalqini Polsha hukmronligidan ozod qilishda katta rol o’ynadi.