“Xorezmskaya Pravda”

“Xorezmskaya Pravda” (“Xorazm haqiqati”) — rus tilida chiqadigan ijtimoiy siyosiy gazeta. Urganch shahrida haftada 2 marta chop etiladi. Muassisi: Xorazm viloyati hokimligi. Dastlab, 1921 yil 6 iyuldan Xivada “Izvestiya Polnomochnogo predstavitelstva RSFSR v Xorezmskoy Sovetskoy Respublike” (Xorazm Sovet Respublikasidagi RSFSR Muxtor vakilligining madaniy-ma’rifiy komissiyasi organi sifatida), keyin “Poslednie Vesti” (“so’nggi xabarlar”) nomi bilan rus tilida haftada 3 marta chiqa boshlagan. 1927 yil 21 maydan shu gazeta o’rniga “inqilob quyoshi” gazetasiga ruscha ilova — “solntse revolyutsii” nashr etilgan. 1941 yil 1 yanvardan hozirgi nomda. Gazetaga turli davrlarda I.Bik, G. Zavelskiy, V. Nikolaev, P. Podvarkov, K. Sergeev, G. Gulishsh, B. Pereplesnin, P. Borodin, E. Tipikin, V. Milgotin, O. Demchik, G. Rahimboeva va boshqalar muharrirlik qilishgan. Muharriri R. Iskandarov (1995 yildan). Adadi 1048 (2004).