YALANG JABRALILAR

YALANG JABRALILAR, yalang’och jabralilar — orqa jabrali mollyuskalar turkumi. Chig’anog’i va mantiya bo’shlig’i yo’qolib, ikkilamchi jabralari rivojlangan (nomi shundan). Uzunligi 20 santimetrgacha. Tanasi va jabralari qizil tusda. Planktondagi lichinkasi chig’anog’ini metamorfozdan so’ng tashlab yuboradi. 200 ga yaqin turi dengizlarda tarqalgan. Shilimshiq modda bilan qoplangan tuxumlarini ipga tizib qo’yadi. Yirtqich bo’shliqichlilar bilan oziqlanganida bo’shliqichlilar tanasidagi otuvchi hujayralari hazm bo’lmasdan Yalang jabralilarning hazm qilish sistemasi orqali uning orqa tomoniga o’tadi va himoya funktsiyasini bajara boshlaydi. Suv tubida, balchiqda, ba’zan planktonda yashaydi.