YER NURLANISHI

YER NURLANISHI — yer sirtining issiqlik nurlanishi; yer sirtining temperaturasi uncha yuqori bo’lmaganligi uchun undan to’lqin uzunligi 3-80 mkm gacha bo’lgan elektromagnit nurlanishlar chiqib turadi. Yer sirtidan chiqadigan to’lqinlar atmosferada yutilib, uni qizdiradi. Atmosfera ham yerga deyarli o’shanday uzunlikdagi elektromagnit to’lqinlari yuboradi va yer sirti yo’qotgan issiqlik o’rnini qisman qoplaydi. Yer nurlanishi bilan atmosfera nurlanishi orasidagi farqni, ya’ni effektiv nurlanishni maxsus asboblar (pirgeometrlar) bilan o’lchash mumkin. Havo ochiq bo’lgan kechalarda atmosfera nurlanishi kichik, ya’ni effektiv nurlanish (minutga 1 santimetr kvadrat sirtdan 0,1—0,2 kal) katta bo’lgani uchun yer sirti hamda havoning pastki qatlamlari tezda soviydi. Havo bulutli kechalarda effektiv nurlanish kichik bo’lgani uchun yer sirti uncha sovimaydi. Kunduz kunlari atmosfera nurlanishidan tashqari yer sirtiga quyosh radiasiyasi tushadi va yer sirti ancha qiziydi.