Tog’ jambil

Tog’ jambil (Thymus L.) labguldoshlarga mansub ko’p yillik o’simliklar turkumi. O’zbekistonda 3 turi: Zarafshon Tog’jambili (T. zeravshanicus yuok.) va soxta Tog’jambil (T. insertus), oddiy Tog’jambil (T. vulgarus) uchraydi. Zarafshon Tog’jambili Toshkent, Samarqand viloyatlarida, soxta Tog’jambil faqat Farg’ona tog’larining o’rta va yuqori qismidagi Toshloq yerlarda o’sadi. Sershox, past bo’yli (5— 10 santimetr), o’rmalab o’suvchi chala butacha. Barglari oddiy, mayda, teskari tuxumsimon, yoki cho’ziq, qaramaqarshi joylashgan. Guli mayda, pushti va qizg’ish, xushbo’y, to’pgul hosil qiladi. Iyun—sentabr oylarida gullab urug’laydi. Mevasi kosachabarglari bilan qo’shilib o’sgan 4 ta yong’oqcha. Tog’jambil efir moyli va shirali o’simlik hisoblanib, tabobatda ishlatiladi.