GO’ZAL QORA

GO’ZAL QORA — o’rtapishar xo’raki uzum navi. Butunittifoq o’simlikshunoslik ilmiy tadqiqot institutining O’rta Osiyo tajriba stansiyasida M.S.Juravel, AM.Negrul, G.K.Muhamedovlar tomonidan Kattaqo’rg’on va Dodrelyabi navlarini chatishtirib olingan duragay urug’lardan chiqarilgan. Tupi kuchli o’sadi. Guli ikki jinsli. Uzum boshi o’rtacha, yumaloq, 500-600 gramm keladi. Shingil va g’ujumlari o’rtacha tig’iz. Mevasi yirik, ko’kish-qora rangda. Go’zal qora kurtak yozgandan boshlab faol harorat yig’indisi 2800°da 136 kunda — avgust oyi oxirlarida pishadi. Hosildorligi 220-240 tsentner/gektar. Kasalliklar bilan kam zararlanadi. Asosan yangiligida iste’mol etiladi va mayiz solinadi. O’zbekistonning barcha viloyatlarida rayonlashtirilgan.