Karimov Jo’ra

Karimov Jo’ra (1946.17.12, Qarshi tumani Yakkayog’och qishlog’i) — O’zbekiston Respublikasi xalq o’qituvchisi (1999). Qarshi pedagogika institutining fizika-matematika fakultetini tugatgan (1968). 1968-79 yillarda Qarshi tumanidagi 12 — maktab, 1979 yildan 9-maktabda fizika o’qituvchisi. Karimov fizika darsini o’zi yasagan ko’rgazmali qurol asosida o’tkazadi. Uning baholar ko’rsatkichi, elektr harakati ko’rgazmalari ko’rgazmali qurollar tanlovida sovrinli o’rinni egallagan. Karimov yangi pedagogik texnologiyalar asosida fizika fanini o’qitishda «konferentsiya», «muloqot», «milliy o’yinlardan foydalanish» kabi zamonaviy darslar orqali EHMlardan foydalangan holda o’quvchilarga bilim berib kelmoqda.