ASO-MUSO

ASO-MUSO, hassa-Muso (Abelia corymbosa) — shilvidoshlar oilasining abeliya turkumiga mansub sershox va serbarg buta. Tanasining po’sti kulrang, titilgan, ba’zan tanadan qisman ajralgan. Poyasi olti qirrali. Barglari qisqa bandli, ellipssimon (1,5 — 6 santimetr), cheti tekis, ba’zilari kungurador. Gullari bir nechtadan (ko’pincha uchtadan) bo’lib, to’pgulga yig’ilgan; kosacha qaytaqisi (5 — 8 millimetr kenglikda) to’rt (ba’zan uch) bo’lakli; toj-bargi oqish, 10-15 millimetr uzunlikda, changchilari to’rttadan bo’lib toj naychasining ichida joylashgan; urug’chisi bitta, urug’chi ustunchasi naychadan bir oz chiqib turadi. Mevasi bir oz cho’ziq va yapaloq (5 — 8 millimetr uzunlikda), tukli, faqat O’rta Osiyo (Tyanshan tog’lari) uchun xos endemik o’simlik. A. Kirg’iztov, Talas, Sharqiy Chatqol, Susamir va Farg’ona tog’lari (Moylisoy, Arslonbob) ning yong’oqzor va archazorlarida uchraydi. Yog’ochi qattiq bo’lganidan juda qadrlanadi.