Latviya universiteti

Latviya universiteti — Latviyadagi birinchi milliy oliy o’quv yurti. Latviyadagi yirik o’quv, madaniy va ilmiy markaz hisoblanadi. Riga shahrida joylashgan. 1919 yil tashkil etilgan. 1940-58 yillarda Latviya davlat universiteti, 1958-90 yillarda P. Stuchka nomidagi Latviya davlat universiteti deb nomlangan; 1990 yildan hoz. nomda. 1990 yil teologiya fakulteti, 1998 yil tibbiyot fakulteti faoliyati tiklandi. Latviya universitetida 12 fakultet va 24 ilmiy tadqiqot instituti, kutubxona (2,1 milliondan ortiq asar), botanika bog’i, fan va texnika muzeyi (6 filiali bilan) bor (1999); 1998/99 o’quv yili universitetda 20 mingdan ziyod talaba ta’lim oldi, 1560 o’qituvchi, jumladan, 116 professor ishladi. Latviya universitetida ta’lim fanning 24 tarmog’i, jumladan, tibbiyot va teologiya bo’yicha bakalavr, magistr, Doktorlik darajasini olish ta’minlanadigan dastur bo’yicha olib boriladi. Universitet bir nechta ilmiy jurnal nashr etadi.