Shamol energetikasi

Shamol energetikasi — fan va texnikaning shamol oqimining kinetik energiyasidan mexanik, elektr va issiqlik energiyasi olishda foydalanish usullarini, nazariy asoslarini ishlab chiquvchi va xalq xo’jaligida shamol energiyasidan foydalanish tarmoqlari hamda yullarini belgilovchi sohasi. Inson shamol kuchidan qadimdan foydalanib kelgan. Oldiniga uning kuchidan faqat yelkanli qayiqlarda foydalanilgan, keyinchalik (miloddan avvalgi 2-1-asr) Misr va Xitoyda shamol tegirmonlari paydo bo’lgan, keyinchalik shamol dvigatellari va qurilmalari yaratilgan. Shamol energiyasidan Quyosh va suv energiyasi bilan birga foydalanish katta ahamiyatga ega. Shamol energetikasi, asosan, 2 qismga bo’linadi: shamol texnikasi va shamoldan foydalanish. Shamol texnikasi qismi shamol kuchidan foydalanib ishlovchi texnika vositalari (agregatlari, dvigatellari, qurilmalari) ni loyihalashning nazariy asoslari va amaliy usullarini ishlab chiqish bilan shug’ullanadi. Shamoldan foydalanish qismida shamol energiyasidan samarali foydalanish, shamol qurilmalaridan unumli foydalanish, ularning texnikiqtisodiy ko’rsatkichlarini yaxshilash masalalari va boshqalarning nazariy va amaliy masalalari o’rganiladi va amalda tatbiq qilinadi. Shamol energetikasi o’zining nazariy va amaliy masalalarini o’rganish va ishlab chiqishda boshqa fan sohalariga, ayniqsa, aerologik tadqiqotlar natijalariga asoslanadi. Boshqa energiya manbalaridan foydalanish noqulay va umuman bunday manbalar yo’q joylarda Shamol energetikasi ishlanmalari juda asqotadi. O’rta Osiyoda (xususan, O’zbekistonda) dasht, cho’l va chala cho’llarda Shamol energetikasi texnika vositalari qo’l kelishi mumkin. O’zbekiston Fanlar Akademiyasi energetika va avtomatika institutida Shamol energetikasi muammolari bilan ham shug’ullaniladi.