Vologda viloyati

Vologda viloyati — Rossiya Federatsiyasi tarkibidagi viloyat. 1937 yil 23 sentabrda tuzilgan. Vologda viloyatida 15 shahar va 14 shaharcha bor. Maydoni 145,7 ming km2. Aholisi 1367 ming kishi (1999). Markazi — Vologda shahri. Vologda viloyatining yer yuzasi tekislik. Qazilma boyliklari: torf, qo’ng’ir temirtosh, o’tga chidamli gil, kvars qumlari, osh tuzi va mineral buloqlar. Iqlimi mo’tadil kontinental. Yanvarning o’rtacha temperaturasi — 14°, iyulniki 18″. Yiliga 500 mm yog’in tushadi. Eng yirik daryolari: Suxona, Yug, Mologa, Sheksna va boshqalar. Vologda viloyatidan Volga-Boltiq suv yo’li va shimoliy Dvina kapali o’tadi. Ko’llari: Onega, Beloe, Kubena. Janubi-g’arbida Ribinsk suv ombori bor. Tuproqlari chimli-podzol, allyuvial va chimli karbonatli, botqoq tuproqlar. Maydonining 70— 80% o’rmon, 12% botqoqlik. Vologda viloyati Rossiya Federatsiyasidagi eng yirik yog’och tayyorlash va yog’ochsozlik sanoati rayonlaridan biri. Yirik tsellyuloza-qog’oz kombinatlari, qog’oz, karton fabrikalari, fanera korxonalari bor. Qora metallurgiya (Cherepovesda metallurgiya kombinati, Velikiy Ustyugda quyish-mexanika zavodlari) yetakchi tarmoq hisoblanadi. Mashinasozlik (Cherepoves, Vologda), metallsozlik (arra, yog’och tilish ramalari, sudrash traktorlari, qog’oz tayyorlash mashinalari va boshqalar ishlab chiqariladi), o’rmon kimyosi, yengil sanoat ham muhim o’rin tutadi. Oziq-ovqat sanoatida chorvachilik mahsulotlaridan sut, go’sht, yog’, pishloq tayyorlanadi. Ko’llardan baliq ovlanadi. Badiiy hunarmandchilik (krujevo to’qish va boshqalar) rivojlangan. Qishloq xo’jaligi sut chorvachiligi va zig’irchilikka ixtisoslashgan. Asosiy ekinlari — javdar, suli, arpa, tolali zig’ir, yem- xashak ekinlari, kartoshka, sabzavot. Chorvachilikda qoramol, cho’chqa, qo’y va echki, parranda boqiladi. Vologda viloyati hududidan Moskva — Arxangelsk, Kirov — Sankt- Peterburg temir yo’l o’tgan. Volga-Boltiq suv yo’li va shimoliy Dvina suv sistemasida kemalar qatnaydi. Vologda viloyatida 3 oliy o’quv yurti, 3 teatr, 4 muzey bor.