“YOSHLIK” KO’NGILLI SPORT JAMIYATI

“YOSHLIK” KO’NGILLI SPORT JAMIYATI — O’zbekiston Respublikasidagi umumta’lim maktab va boshqa o’quv muassasalarining ko’ngilli sport jamiyati. O’zbekiston Respublikasi xalq ta’limi vazirligi huzurida tuzilgan (1998 yil 21 aprel). Maktab o’quvchilari o’rtasida sport ishlarini keng yo’lga qo’yish va sportni ommalashtirishga da’vat etilgan. “Yoshlik” ko’ngilli sport jamiyati har o’quv yilida “Umid nihollari” o’yinlarini o’tkazadi. Bu o’yinlar kuzgi ta’tilda maktab va tuman, qishki ta’tilda viloyat, bahorgi ta’tilda mamlakat miqyosida bo’lib o’tadi. O’yinlar yoshlarni foydali va mazmunli harakatga yo’naltirish, kurashda chiniqtirish, jamoa bo’lib harakat qilish, g’alabaga intilish fazilatlarini tarbiyalash va sportni yoshlarning hayotiy ehtiyojiga aylantirishga xizmat qiladi. Jamiyat safida 5672482 a’zo, shulardan 311830 razryadli sportchi, 2727 ta 1 razryadli, sport ustaligiga nomzod va 86 sport ustasi bor (2001). 4619 ta sport zali, 6157 ta basketbol, 9394 ta voleybol maydonchasi, 119 ta suzish havzasi, 27 ta stadion, 4552 ta qo’l to’pi maydoni, 4748 ta futbol maydoni va 1830 ta tir jamiyat ixtiyoridadir.