CHIL

CHIL (Perdix perdix) — tovuqsimonlar turkumining qirg’ovullar oilasiga mansub qush. Tanasi 35 santimetrcha. Vazni 350-600 gramm. Umumiy ko’rinishi kichikroq tovuqni eslatadi. Narining usti kulrangqo’ng’ir, qora chiziqchalari, qornida taqasimon jigarrang dog’i bor. Modasi odmiroq tusda. Yevropa, Osiyo, Janubiy G’arbiy Sibir va O’rta Osiyoning Sharqiy hududlarida tarqalgan. Asosan, dasht va o’rmondasht, daryo qayirlari, g’alla dalalarida qish va kuzda to’da, boshqa fasllarda juft-juft bo’lib yashaydi. Uyasini yerga yasaydi. 12-20 ta tuxum qo’yib, nari va modasi navbat bilan 24-25 kun bosadi. Asosan, o’simlik urug’lari, mevalari, yashil qismi, yoz va kuz oylarida hasharotlar bilan oziqlanadi. Go’shti mazali, ovlanadi. Ovchilik xo’jaliklarida ko’paytiriladi.