Shamayeva Muhabbat

Shamayeva Muhabbat (asl ismi Lyuba) (1944.12.5, Buxoro) — xonanda, O’zbekiston xalq artisti (1978). Ijodiy faoliyatini Buxoroda xavaskorlik ansamblida boshlagan. 1963-65 yillar O’zteleradiosining «maqom ansambli», 1965-91 yillar estradasimfonik orkestrida yakka xonanda. 1990-yillarning 2-yarmidan NyuYorkdagi «tiklanish» Buxoro yahudiylari musiqali teatri aktrisasi. Jozibali, yorqin ovoz sohibasi. Repertuaridan o’zbek xalq («Tanavor», «Farg’onacha» va boshqalar) ashulalari, bastakor va kompozitorlar yaratgan lirik va estrada qo’shiqlari («ko’chalar», D. Zokirov; «Toshkent nahori», «tong navosi», M. Mirzayev; «o’rik gullaganda», M. Leviev; «Yo’llarim», M. Ashrafiy; «Mirzacho’l yoryori», F. Qodirov va boshqalar) keng o’rin olgan. U, shuningdek, turli xalklar (tojik, yahudiy, Ozarbayjon, tatar, turk, Eron, Arab, afg’on, frantsuz va boshqalar) qo’shiqlarini ham ijro etgan. Yevropa va Osiyo mamlakatlarida gastrolda bo’lgan. Ijrolari gramplastinka va kompakt disklarga yozilgan.