BOSQOQ

BOSQOQ (turkiycha — bosuvchi, ezuvchi) — mo’g’ul xoni tomonidan qaram mamlakatlarga maxsus yorliq bilan yuborilgan amaldor, noib. Bosqoq o’z ma’muriy mavqeiga kura bek va lashkarboshilardan yuqori turgan. Bosqoqga maxsus harbiy otryad va turli mayda amaldorlar biriktirilgan bo’lib, uning vazifasi mahalliy hokimiyat faoliyatini nazorat qilish, soliq va o’lpon yig’ish, tub aholini ro’yxatga olishdan iborat bo’lgan. Bosqoqlar soliq va o’lpon yig’ishda benihoyat shafqatsizlik qilganlari boisidan mustamlaka mamlakatlarda tez-tez qo’zg’olonlar sodir bo’lib turgan. Bosqoqlik 13-asrning o’rtalarida Eron va Rusda ham joriy etilgan. Mo’g’ul xonlari 14-asrning boshlarida mazlum xalqlar kurashining kuchayishi munosabati bilan Bosqoqlikni bekor qilib, soliq va o’lpon yig’ishni mahalliy hokimiyatga topshirishga majbur bo’lishgan.