YAKAN

YAKAN — yakandoshlar oilasiga mansub ko’p yillik, ba’zan bir yillik o’t o’simliklar turkumi. 250 turi ma’lum. Asosan, mo’tadil va sovuq mintaqalarda, tropik va subtropik zonaning baland tog’liklarida tarqalgan. O’zbekistonda Yakanning cho’lbaqa Yakani yoki qizg’ish Yakan, duragay Yakan, egilgan Yakan, yirik changdonli Yakan, bo’g’imli yoki yaltiroq Yakan va Jerar Yakani yoki qizil Yakan kabi 16 turi mavjud. Bo’yi 10-90 santimetrgacha, barglari qinli, gullari qo’ng’iroq yoki sarg’ishyashil, ikki jinsli soyabonsimon to’pgullarga yig’ilgan. May — avgust oylarida gullab, sentyabr — oktyabrda urug’laydi. Mevasi uch urug’li ko’sakcha. O’zbekistonning barcha tumanlaridagi zax, sersoya yerlarda hamda begona o’t sifatida sholizorlarda o’sadi. Ko’pgina turlari chorva mollari uchun yaxshi ozuqa.