FAN-TEXNIKA INQILOBI

FAN-TEXNIKA INQILOBI, ilmiy-texnika inqilobi — ishlab chiqaruvchi kuchlarning tub sifat o’zgarishlarida fanning asosiy ishlab chiqarish omili bo’lishi. 20-asrning o’rtasida boshlangan. Fan-texnika inqilobi mehnatning mazmuni, xarakteri va sharoitini, ishlab chiqaruvchi kuchlar strukturasini, mehnat taqsimotini, jamiyatning professional strukturasini o’zgartiradi; mehnat unumdorligining o’sishiga olib keladi; jamiyat hayotining hamma tomonlariga, madaniymaishiy hayotga, inson psixologiyasiga ta’sir ko’rsatadi. Xodimlarning ma’lumot darajasi, malakasi, madaniyati, uyushqokligi va mas’uliyatiga katta talablar qo’yadi. Elektron hisoblash mashinalari Fan-texnika inqilobining ramzi hisoblanib, uning paydo bo’lishi inson funktsiyalarini asta-sekinlik bilan mashinalarga berishga, ishlab chiqarish va boshqaruvni kompleks avtomatlashtirishga olib keldi. Hozirgi davrda Fan-texnika inqilobi quyidagi xususiyatlari bilan ajralib turadi: fanning bevosita ishlab chiqaruvchi kuchga aylanishi; shu bilan bog’liq ravishda ijtimoiy mehnat taqsimotida yangi davrning boshlanishi; mehnatning xarakteri va mazmunida ijodiy elementlarning kuchayishi; yangi energiya manbalari yordamida sun’iy materiallarning yaratilishi; axborotning ijtimoiy va iqtisodiy sohalardagi ahamiyatining kuchayishi, ommaviy kommunikasiya vositalarining misli ko’rilmagan taraqqiyoti; umumiy va maxsus ta’lim hamda madaniyat darajasining o’sishi; fanlararo o’zaro bog’liq murakkab muammolarni kompleks hal qilish, ijtimoiy fanlar rolining ortishi; ijtimoiy taraqqiyotning keskin tezlashishi, planeta miqyosida integrasiyalashuv; ekologik muammoning paydo bo’lishi va u bilan bog’liq xrlda jamiyat tabiat tizimini ilmiy boshqarishning zarurligi. Fan-texnika inqilobi global muammoga aylangan ayrim salbiy oqibatlarni ham keltirib chiqardi. Bu muammolar (ekologiya, xalqaro terrorizm, demografiya, energiya tanqisligi bilan bog’liq va boshqalar)ni hal qilish uchun kuchlarni birlashtirish taqozo qilinadi.