AGROFIRMA

AGROFIRMA — mahsulot ishlab chiqarish, uni qayta ishlash va sotish, xizmat ko’rsatish tizimidagi korxonalarni yagona boshqaruv asosida birlashtirgan agrosanoat korxonasi. Agrofirma qishloq xo’jalik mahsulotlarini yetishtirish, qayta ishlash va yetkazib berish jarayonlaridagi barcha ishlarni yaxlit tizim orqali o’z vaqtida muvofiqlashtirish, mehnat unumdorligini ko’tarish, xom ashyo nobudgarchiligini kamaytirish, shuningdek ko’rilgan foyda hisobidan yirik investitsiyalarni amalga oshirish hamda foydani Agrofirma tarkibidagi korxonalar o’rtasida taqsimlashga imkoniyat yaratadi. Agrofirma mahalliy resurslardan unumli foydalanishni ta’minlaydi, uning tarkibiga yordamchi tarmoqlar va kichik korxonalar ham kirishi mumkin. O’zbekistonda hukumat farmoyishi bilan keyingi yillarda «Beshariq» (Farg’ona viloyati), «Oqoltin» (Sirdaryo viloyati), «Romitan» (Buxoro viloyati) va boshqa Agrofirmalar tashkil etildi.