ALIBEKOV ISLOM MAYBOSOVICH

ALIBEKOV ISLOM MAYBOSOVICH (1945.15.4, XXR Sin’szyan-Uyg’ur Muxtor tumani, Chugunchaq shahri) — teatr rassomi, Qoraqalpog’iston xalq rassomi (1987). Olmaota badiiy bilim yurtida ta’lim olgan (1962-69). Olmaotadagi Respublika yosh tomoshabinlar teatrida rassom (1969-72); 1972 yildan Qoraqalpoq davlat musiqali drama va komediya teatrida bosh rassom. Alibekovning qoraqalpoq teatrlari uchun yaratgan sahna bezaklari asar ruhi va rejissyor g’oyasiga monandligi bilan ajralib turadi. Alibekovning, shuningdek rangtasvir («Soipov portreti», 1973; «Uchrashuv», 1977 va boshqalar), haykaltaroshlik («Baxt», «Ertak»— ikkalasi ham shamot, 1980 va boshqalar) asarlari bor. Berdaq nomidagi Qoraqalpog’iston Davlat mukofoti laureati (1984).