Jilolash, pardozlash, sayqallash

Jilolash, pardozlash, sayqallash — buyumlar yuzalariga ko’zgusimon shaffoflik (sillikliq, sayqal) berish uchun mexanik yoki dastaki usulda ishlov berish. Metall buyumlarga Jilolash stanoklarida, shuningdek, elektrolitik va elektromexanik usul bilan ishlov beriladi. Jilolash stanoklarining Jilolash qurilmalari fetra, kigiz, bo’z, duxoba, charm va boshqalardan tayyorlangan doyra va tasmalardan iborat bo’lib, ularga oldindan yoki ishlov berish vaqtida Jilolash pastalari (kukunlar) surkalgan bo’ladi. Bunda buyumni stolga, Jilolash qurilmasini shpindelga mahkamlab, Jilolash qurilmasi buyum ustida harakatlantiriladi. Yog’och buyumlarni Jilolash yuzalarga yaltiroq smola (polituralar) surkab ishqalashdan yoki lok-buyoq qoplashdan iborat. Tosh buyumlarning yuzalarini Jilolash uchun ularga Jilolash kukunlari sepib, namlangan kigiz bilan ishlov beriladi. Plastmassa buyumlar barabanlarda yoki Jilolash stanoklarida jilolanadi. Barabanlarda Jilolashda unga buyumlar bilan birga Jilolash aralashmasi (Masalan, mashina moyi yoki vazelin moy shimdirilgan pemza kukuni) solinadi.