ANDIJON MUHANDISLIK IQTISODIYOT INSTITUTI

ANDIJON MUHANDISLIK IQTISODIYOT INSTITUTI — iqtisodchi va muhandislar tayyorlaydigan oliy o’quv yurti. Andijon shahrida. Toshkent davlat iqtisodiyot universitetining Andijon bo’limi negizida 1992 yilda barpo qilingan Andijon iqtisodiyot va boshqaruv instituti hamda Andijon muhandislar tayyorlash eksperimental o’quv-ishlab chiqarish markazi negizida 1995 yil 5 iyunda tashkil topdi. Institut tarkibidagi kunduzgi «Boshqaruv», «Iqtisodiyot», «Muhandislik» fakultetlari va sirtqi fakultetda 10 ta’lim yo’nalishi bo’yicha bakalavrlar va 3 mutaxassislik bo’yicha magistrlar tayyorlanadi. 1999/2000 o’quv yilida 3,5 mingdan ortiq talaba ta’lim oldi; 18 kafedrada 245 professor-o’qituvchi, jumladan 12 fan doktori va professor, 75 fan nomzodi, dotsent ishladi. Institut aspiranturasida 20 ga yaqin aspirant tahsil olmoqda. Institut kutubxonasida 120 mingdan ziyod asar saqlanadi (2000). Iqtisodiyot va texnika-texnologiya sohalari bo’yicha ilmiy kadrlar ham tayyorlanadi. Ilmiy ishlar nashr etadi. 2000 yilgacha 11 mingdan ortiq mutaxassislar tayyorlandi.