ANGREN SURATLAR GALEREYASI

ANGREN SURATLAR GALEREYASI, V. I. Ufimtsev nomida — rassom V. Ufimtsev tashabbusi va uning shaharga sovg’a qilgan 50 asari asosida tashkil qilingan muassasa. 1964 yil 31 oktabrda ochilgan. V. Ufimtsev asarlari uchun maxsus xonalar ajratilgan; keyingi yillarda to’plangan 70 dan ortiq rassomning 1000 dan ziyod asari uchun yangi xonalar ajratilib kengaytirilgan. Angren kulolchilik zavodining badiiy buyumlari, turli mahsulotlari ham alohida xonaga qo’yilgan. Rassom vafoti (1964) dan keyin uning rafiqasi G. V. Ufimtseva galereyaga ijodkorning barcha mujassamot, qoralama (etyud), chizgilari (jami 624 asar), rassomning shaxsiy buyumlari, hujjat, maktub, fotosuratlarini ham topshirgan. 1986 yildan galereya qoshida tasviriy san’at studiyasi ishlaydi. Unda havaskor rassom — ishchiyoshlar rassomlik (rang-tasvir, grafika), haykaltaroshlik sirlarini o’rganadilar.