BARBYUS

BARBYUS (Barbusse) Anri (1873 -1935) — frantsuz yozuvchisi, jamoat arbobi. Ilk «Yig’lovchi ayollar» (1895) she’riy to’plami, «Yolboruvchilar» (1903), «Do’zax» (1908) romanlarida ijtimoiy tengsizlik, xalqning nochor hayoti aks etgan. Bularda modernizm ta’siri seziladi. 1-jahon urushi uning ijodida burilish yasadi. Modernistik kayfiyatdan voz kechib, realistik ijod yo’liga o’tdi. Mopassan, Zolya an’analarini davom ettirdi. «O’t» (1916), «Yorishuv» (1919) romanlarida o’zi ishtirok etgan 1-jahon urushi vaqtidagi ommaning kayfiyati ifodalangan. «Xalqlar» (1925) romani, «Kuch» (1925), «Jallodlar» (1926), «Hodisalar» («Haqqoniy qissalar», 1928) va boshqa povest, hikoya va ocherklar to’plamida davrning muhim ijtimoiy voqealari aks etgan. Barbyus o’zi kompartiya a’zosi bo’lsada, umrining oxirlarida kommunistik inqilob dunyoni zulm zanjiridan ozod qila olmasligini, aksincha, yangi zulm paydo qilishini tushunib etdi. Barbyus xalqaro militarizmga qarshi madaniyat arboblari birlashmasi «Klarte» tashkilotchisi (1919). «Klarte» jurnalni chiqargan (1919 — 24).