BUXORO VILOYAT QO’G’IRCHOQ TEATRI

BUXORO VILOYAT QO’G’IRCHOQ TEATRI — bolalar teatri. 1982 yil Buxoro shahrida tashkil etilgan. O’zbek va rus guruhlari mavjud. A. Abdullayev, G. Fayziyeva, N. Rahmatova, Sh. Jabborov, J. Baqoyev, A. Mirg’iyosov, O. Safarov, V. Zubkovskaya, E. Vardasheva kabilar teatrning ilk ijodkorlaridir. Birinchi bosh rejissyor Shomurod Yusupov (1982— 92). Teatr ijodkorlari xalq an’anaviy qo’g’irchoq teatri tomoshalarini ijodiy o’zlashtirgan holda, chet el qo’g’irchoq teatrlari san’ati yutuqlari bilan o’z san’atlarini boyitdilar. Eng yaxshi spektakllari: «Chodirjamol», «Do’stlik sinovi» (Q. Majidov), «Baxt axtargan Hasan» (E. Speranskiy), «Senimi bo’ri, shoshmay tur» (A. Kurlyanskiy, A. Xait), «Karvonsaroy» (Sh. Yusupov), «Mittimiton» (M. Xalil), «Miyov ismli mushukcha» (Nguen din Txi), «Obi hayot» (G. Aliyeva), «Eng kichik gnom» (V. Seduxin) va boshqalar. Bosh rejissyor — Galina Aliyeva (1998 yildan).