DASTURXONIY

DASTURXONIY — ertagi olma navi. R. R. Shreder nomidagi bog’dorchilik, uzumchilik va vinochilik ilmiy tadqiqot institutida Yozgi (Persik letniy) navini nav ichida changlatish yo’li bilan chiqarilgan. Daraxti o’rtacha kattalikda, keng shoxshabbali. Ko’chati o’tqazilgandan so’ng 5-6-yili hosilga kiradi. Aprelning o’rtalarida gullaydi. Mevasi o’rtacha kattalikda (120-200 gramm), pusti och yashil, sarg’ish, eti och novvot rang, o’rtacha suvli, shirin-nordonroq, 20 yillik daraxtlaridan 400-500 kilogrammgacha hosil olinadi. Iyul oyining oxirlarida pishadi. Uzoq joylarga jo’natishga yaroqli. O’zbekistonning barcha zonalarida ekish uchun tavsiya etilgan.