No’xatgul

No’xatgul (Lathyrus odoratus L.) -dukkakdoshlar oilasiga mansub bir yillik sertuk o’t. Bo’yi 15-60 santimetr. Poyasi kamshox, bandining uchi jingalak; jingalaklari yordamida boshqa o’simliklarga ilashib o’sadi. Bargi uzun bandli, juft yaprokli. Guli zigomorf, kattaligi 2-3 santimetr, rangi oq, pushti, qizil, hidi o’tkir, uzun gulbandga 1 — 3 tadan o’rnashgan. Mevasi ingichka (uzunligi 25-50 millimetr) sertuk dukkak. Har bir dukkagida 4-6 tadan sharsimon urug’i bor. Apr.dan sovuq tushgunga qadar gullab urug’laydi. Asosan, tog’yon bag’irlari, daryo o’zanlari, vodiylar, bahorikor yerlarda o’sadi. Issiqxonalarda ham yetishtiriladi, avgustda ekilganda yanvarda gullaydi.