«O’ZKABEL» AKTSIYADORLIK JAMIYATI

«O’ZKABEL» AKTSIYADORLIK JAMIYATI — elektrotexnika sanoatining yirik korxonasi. Toshkent shahrida joylashgan. «O’zeltexsanoat» uyushmasi tarkibiga kiradi. Energetika, geologiya, temir yo’l transporti, aloqa, mashinasozlik va boshqalar sanoat tarmoqlarida ishlatiladigan turli xil kabel mahsulotlari: yuqori kuchlanishli elektr kabellari, shahar telefon tarmoqlari va uzoq masofalar aloqa kabellari; qoplamali elektr simlari, payvandlash, elektr energiyasini uzatish simlari, neft nasoslari uchun kabellar, geofizika kabellari va simlari ishlab chiqaradi. Toshkentga evakuatsiya qilingan «Elektrokabel» zavodi asosida 1941 yil noyabrda tashkil qilingan. Urush yillarida harbiydala aloqasi uchun simlar ishlab chiqargan. Urushdan keyin geofizika tadqiqot kabellari, yo’llarni elektrlashtirish uchun kontaktli simlar ishlab chiqarishda yetakchi korxonaga aylandi. Korxonada mis katanka ishlab chiqarishdan boshlab murakkab kabel mahsuloti turlarini ishlab chiqarishgacha to’liq texnologik tsikl yaratilgan. 1995 yildan ochiq turdagi aktsiyadorlik jamiyati. 2003 yildan chet el investitsiyasi ishtirokidagi O’zbekiston-Amerika qo’shma korxonasi aktsiyadorlik jamiyati («2-egotax» kompaniyasi korxona aktsiyalarining 64% ga ega). Korxona AQSh, Italiyada ishlab chiqarilgan uskunalar bilan jihozlandi. Mahsulotlari sifati xalqaro standartlarga javob beradi. 2004 yilda 99 tonna mis sim, 75 tonna trolley simlari, 254 kilometr uzoq aloqa kabellari, 1458 kilometr geofizika kabellari, 9322 kilometr yoritish kabellari va boshqalar mahsulotlar ishlab chiqarildi, eksport 11 million. AQSh dollarini tashkil etdi. Mahsulotlari Rossiya, Ukraina, Qozog’istonga va boshqalar mamlakatlar- ga chiqariladi. Moskva, Yekaterinburg, Olmaota, Chimkent, Kiyevda savdo uylari ochilgan. Xalqaro «Elektrkabel» kabel mahsulotlari ishlab chiqaruvchilar uyushmasiga a’zo.