ZEBRALAR

ZEBRALAR, Afrika yovvoyi otlari (Equus) — otlar kenja urug’i. Tanasining uzunlihi 200-240 santimetr, bo’yi yag’rinidan 120-140 santimetr, dumi — 47— 54 santimetr, vazni 350 kilogrammgacha. Tanasining rangi — oq va qora ko’ndalang yo’lyo’l chiziqli (himoya rangi). Yoli kalta va tik, dumining uchida uzun qillardan iborat popugi bor. Ochiq dashtlarda 10-30 tadan poda bo’lib yuradi. Juda ehtiyotkor, tez yuguradi. 1-1,5 yoshida voyaga yetadi. Homiladorlik davri 346-390 kun. Qo’lga o’rganadi, tutqinlikda ko’payadi. Ot va eshak bilan chatishadi. Zebralarning 4 turi bor. Tog’ zebrasi (E. zebra) Janubiy G’arbiy Afrikada tarqalgan, ko’rinishi eshakka o’xshaydi, Zebralar orasida eng kichigi. Burchellov zebrasi (E. burchelli) Sharqiy va Markaziy Afrikada tarqalgan. Grevi zebrasi (E. grevyi) Sharqiy Afrika (Jan. Efiopiya, Somali, Keniya) da tarqalgan, ancha yirik, toychasining yelkasidan dumigacha tik va to’q qizil juni bo’ladi. Bu belgi otlar qadimgi ajdodlarining yoli faqat bo’ynida emas, orqasida ham bo’lganligini ko’rsatadi. Hozirgi qirib yuborilgan kvaggi zebrasi Janubiy Sharqiy Afrikada yashagan, ko’rinishi otga o’xshagan. Qimmatli terisi uchun ko’plab ovlanishi tufayli Zebralar soni keskin kamayib ketgan. Tog’va Grevi Zebralari Tabiatni muhofaza qilish xalqaro Ittifoqi qizil kitobiga kiritilgan.