AXTALASH, BICHISH

AXTALASH, BICHISH — urg’ochi va erkak hayvonlarning jinsiy bezlarini olib tashlash, ularni bepusht qilish yoki jinsiy faoliyatini to’xtatish maqsadlarida erkak hayvonlarning urug’ tizimchasini uzish. Hayvonlar xo’jalik hamda davolash maqsadlarida axtalanadi. Axtalangan hayvon yuvosh bo’lib qoladi, tez semiradi, go’shti sifati yaxshilanadi, qo’ylar ko’p jun beradi. Axtalash operatsiyasi ochiq usulda — moyak xaltachasini batamom yorib, yopiq usulda — xaltachani to’liq yormasdan turib moyaklarni olish, qonsiz usulda— moyaklarni qoldirib, urug’ yo’lini uzish va qonli usulda — xaltachani butunlay kesib tashlash yo’llari bilan o’tkaziladi. Odatda, ayg’irlar 2 — 3 yoshda, buqachalar 3 — 6 oyligida, tuyalar 2,5 — 3 yoshda, qo’chqorlar 2 — 4 oyligida axtalanadi. Cho’chqa, quyon, tovuq, sigir, biyalar ham axtalanadi. Erkak hayvonlarni Axtalash orxiektomiya, urg’ochilarini Axtalash ovariektomiya deyiladi.