Madoiniy Abulhasan Ali ibn Muhammad ibn Abdulloh ibn Abu Sayf

Madoiniy Abulhasan Ali ibn Muhammad ibn Abdulloh ibn Abu Sayf (9-asrning 1-yarmi) — tarixchi va adib. Basrada ta’lim olgan. Birmuncha vaqt Madoin (Mesopotamiya)da turgan (Madoiniy nisbasi ham shundan), Bag’dodda yashagan. Ibn an-Nadim «fehrist» («Mundarija») nomli asarida Madoiniy to’g’risida eslatib o’tgan. Madoiniy Islom, xalifalik tarixi, bosqinchilik urushlari, qo’zg’olonlar hamda o’lka va shaharlar tarixi, Muhammad (sav) tarjimai hollari, adib va shoirlar haqida 239 ta asar yozgan. Madoiniy asarlari keying asrlarda yozilgan Arab tarixchilarining kitoblariga asosiy manba bo’lib xizmat qilgan. «Axbor ul-Xulafo» («xalifalar xabarlari»), «Axbor Quraysh» («Kuraysh qabilasi xabarlari»), «kitob futuh ash-Shom» («Shomning bosib olinishi haqida kitob»), «Axbor shuaro» («shoirlar solnomasi»), «Tarix al-buldon» («O’lkalar tarixi») kabi asarlar muallifi.