Bo'lim: G harfiga oid biologiyaga oid ensiklopedik atamalar

Gaz almashinuvi – organizm bilan tashqi muhit o’rtasidagi gaz almashinuvi. U organizm kislorodni qabul qilishi, karbonat angidrid, juda oz miqdorda boshqa gazsimon moddalar va suv bug’ini chiqarishidan iborat.

Gastrulatsiya – ko’p hujayrali hayvonlarning embrion rivojlanishidagi dastlabki jarayonlardan. Bunda bir qavatli embrion (blastula}dan ikki qavatli (gastrula), umurtqalilarda esa uch qavatli embrion (ya’ni ekto-va entoderma oralig’ida mezoderma) hosil bo’ladi.

Gaptoglobin – qon zardobining murakkab oqsili (glikoprotein). Gemoglobin bilan birga kompleks hosil qiladi. Himoya vazifasini bajaradi. Zaharsizlantirish jarayonlarida ishtirok etadi.

Gapterlar – suvo’tlari va ba’zi yuksak o’simliklarning biror substratga yopishib o’sishi uchun xizmat qiluvchi rizoidlari (soxta ildizlari).

Gaptenlar – immunogen xususiyati chala, ammo zidditanachalar va immunotsitlar bilan o’ziga xos ta’sir qilish xususiyatiga ega kichik molekulali moddalar.

Gaplostemon gul, yakka doirali gul – changchilari faqat gul ichida doira bo’lib joylashgan gul.

Gaploid o’simliklar – xromosomalarning gaploid to’plamiga ega o’simliklar. Bunday o’simliklar ba’zan tabiatda hosil bo’lib turadi va ular diploidli o’simliklardan past bo’yliligi va kuchsiz rivojlanishi bilan farqlanadi.

Gaploid to’plamli xromosomalar jinsiy hujayralar (gametalar)da reduksion bo’linish natijasida yuzaga keladigan xromosomalarning ikki hissa kam soni. Gaploid holat meyoz natijasidir.

Gaploid, yakka, oddiy ko’rinish – gaploid to’plami xromosomaga ega bo’lgan hujayra yoki organizm.

Gaplobiont – hujayralari gaploid sonli xromosomalarga ega jinsiy nasl.