Lentasimon gillar

Lentasimon gillar – asosan, to’rtlamchi davrda muzliklarning erishidan paydo bo’lgan ko’llarda to’plangan cho’kindi jinslar. Lentasimon gillar muzliklarda hosil bo’lgan ko’l yotqiziqlari hisoblanib, loyqa suvlardan cho’kkan mahsulotlar — mayda zarrali qum va gillar yupqa qatlamchalarining kesmada almashinib yotishidan iborat. To’plangan cho’kindilarning qalinligi yil fasliga qarab har xil. Lentasimon gillar to’g’ri qavatlangan bo’ladi. Yozda to’planadigan mayda zarrali qumtosh qavatlari va qishda hosil bo’ladigan gil qavatlari Lentasimon gillar bilan navbatma-navbat qavatlangan. Qum va gil qatlamchalarining jufti bir yillik ko’l yotqiziqlarini tashkil etadi va Lenta deb ataladi. Lentaning qalinligi bir necha mm dan 10 santimetrgacha. Yillik lenta, o’z navbatida, mikroqavatchalardan tuzilgan. Bular iqlimning o’zgarishi va muzliklarning erish tezligiga bog’liq. Lentalar sonini hisoblash orqali butun qatlamning hosil bo’lish vaqtini va turli nuqtalarda joylashgan Lentasimon gillar kesmalarini chekka muzlik yotqiziqlari bilan taqqoslash asosida alohida muz qoplamasi degradatsiya fazalarini va chekinish tezligini aniqlash mumkin. Lentasimon gillar Belorussiya, Boltiqbo’yi mamlakatlari, Rossiyaning Yevropa qismi, shimolda Skandinaviya, Polsha, GFR, AQSh, Kanadada tarqalgan. Muzlik davri geoxronologiyasini ishlab chiqishda Lentasimon gillarning ahamiyati katta.