Voha chigirtkasi, Italiya chigirtkasi

Voha chigirtkasi, Italiya chigirtkasi (Calliptamus italicus L.) — chigirtkalar oilasiga mansub zararkunanda hasharot. Erkagi tanasining uzunligi 14,5—24 millimetr, urg’ochisiniki 24-41 millimetr. Baquvvat tanasi to’q qo’ng’irdan och kulrang yoki sarg’ish kulranggacha. Tuxumli ko’zachasining kattaligi 14-41 millimetr bo’lib, ko’pincha uvatlarga, dala, yo’l chetlari, partav erlardagi chimga qo’yadi. Yevropa, Shimoliy Afrika, Xitoy, Kavkaz, G’arbiy Sibir, Janubiy Oltoy o’lkasi, Qozog’iston va O’rta Osiyoda tarqalgan. Voha chigirtkasi shuvoq- boshoqli o’simliklar o’sadigan cho’llarga xos. Juda ko’payib ketgan yillari g’o’za, dukkakli, poliz, boshoqli va boshqa ekinlarga zarar keltiradi.