Okean suvlari ko’tarilishidan foydalanish mumkinmi?

Agar siz dengiz sohiliga borgan bo’lsangiz, suvning ko’tarilishi va pasayishi o’rtasidagi farqni ko’rgansiz, albatta. Dunyoning ayrim joylarida bu farq 12 metrni tashkil qiladi. Inson uzoq vaqt suvning bunday vaqti-vaqti bilan harakatlanib turishi muhim energiya manbai bo’lishi mumkinligiga e’tibor bermay keldi. Agar undan sharshara va daryolardagi kabi foydalanilganda edi, atrof-muhitga hech bir zarar yetkazmasdan, ko’p miqdorda energiya olish imkoni tug’ilardi. Ilk suv ko’tarilishidan ishlaydigan gidroelektrostansiya Fransiyaning Sent-Malodan unchalik uzoq bo’lmagan Bretani degan joyida qurildi. Dinard va Sent Malo o’rtasidagi Kotanten yarim oroli etagida joylashgan bu gidroelektrostansiya Atlantika okeanidan La-Mansh bo’g’oziga oqib kiradigan suv ega bo’lgan 56 million ot kuchilik quvvatning yarmini elektr energiyasiga aylantirib bera oladi. To’g’onga o’rnatilgan 24 ta kuch qurilmasi bir yilda 540 million kVt/s elektr energiyasi ishlab chiqaradi. Bu, albatta, katta daryolarda qurilgan gidroelektrostansiyalar quvvatidan ancha kam, ammo ularning ishonchliligi ancha yuqori. Dengiz suvining ko’tarilib tushishi muvaqqat ob-havo injiqliklariga bog’liq emas.